Plantun de Prouvènço

Pèr coumpara dos planto d'encò nostre

Orobanche rapum-genistae & Scleranthus annuus

Orobanche rapum-genistae

Orobanchaceae

Nom en français : Orobanche du Genêt.

Descripcioun :
Aquesto erbo-de-taurèu raro au nostre, parasito li genèsto, eici lou tiro-biòu, Genista hispanica, majamen sus sòu séusous. Es uno planto pulèu forto emé uno longo enflourejado. Se recounèis à si flour roso veinado, à sis estigmate jaune, e si estamino estacado à la baso di petalo e pelouso-glandulouso (fielat). Apoundèn que li bratèio bruno se vèson bèn sus lou dessubre.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 80 cm
Fueio : ges
Tipe bioulougico : Teroufite
Cicle bioulougico : Planto de l'an

Gènre : Orobanche
Famiho : Orobanchaceae

Ordre : Lamiales

Coulour de la flour : Roso
Petalo : irreguliero
Ø (o loungour) flour : 17 à 25 mm
Flourido : Printèms - Estiéu

Sòu : Si (Ca)
Autour basso e auto : 0 à 1300 m
Aparado : Noun
Mai à juliet

Liò : Bos clar - Relarg à jóuinis aubret
Estànci : Subremediterran à Subaupen
Couroulougi : Éuroupenco-Ouèst
Ref. sc. : Orobanche rapum-genistae Thuill., 1799

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.